بقلم : هبة وليد صلاح

الحمد لله الوضع استقر والمي رجعت لمجاريها ، كل واحد يرجع يرقع مصالحو من ورى اخر الاحداث الي صارت ولا كأنو صار اشيي ، بعينكو الله ... يا صباح يا فتاح شو صوت الطخ هاظ .. يابا يابا البلد مولعة ، الدرك واهل البلد طابين في بعض والدنيا قايمة قاعدة ... يا حسرة علينا ، ما سدقنا ايمتا النفوس تهدى ، اننعكست مرة ثاني ... يا مَرَة انا طالع اشوف الوضع واجيبلك خبزات معي بس يا رب ما يكونو مسوين اشي في السيارة ، ماصارلي شهرين مشتريها ، الله يستر الله يستر .

يا رب تلطف ، مسيل دموع وناس مخنّقة على الارض وطخطخة على طرف وجنب ومحلات مسكرة والناس هجوم على المخبز الوحيد الي فاتح في البلد وسيارات محروقة ومحلات مكسرة ومباني ومؤسسات مسروقة ... له له له ... معقول الوضع خرب ، وبلشت سكرات الموت تغشانا ؟!

الله على ايامك يا يُمّه .. يُمّه تعالي شوفي عزتنا صارت بالارض .. يُمّه تعالي شوفي كرامتنا صارت تنذل .. يُمّه تعالي شوفي قوتنا صارت على الاهل .. يُمّه تعالي شوفي حاراتنا صارت بحر من دم .. يُمّه القلوب اتحجرت والفتنة انتشرت .. وافعال الرجال صارت حكايا صغار .. والدين صار بالاسم والوطن راح راح راح ... يُمّه هاذي حالنا لا تستغربي .. يُمة هاذي حالنا لا تستغربي .