بقلم : د. فاضل الزعبي
أبو فتحي بيشتكي لأبو يوسف ، لأنه عواد ما دخلوه عمظافة القريه ، و طلب منوه تصريح ، يعني الدخول للمظافة بتصريح من الشاويش.

ابو فتحي راح للشاويش ، و طلب منه تصريح ميشان يدخل مظافة.
عمنا الشاويش بعد ساعه من ألأسئله و ألاستفسارات ، لويش بدك تروح عالمظافه، مين بدك تشوف هناك، شو بدك من اللي بدك تشوفه، و شو صلة القرابة. و و و و و. قله شو لازم يسوي.

يا ابو فتحي اكتب طلب و بعدين وقعة و أختمه من المختار و اثنين معرفين، دير بالك المعرفين لازم يكونو موظفين بلديه او متقاعدين منها، و خذ هالورقه و اكتب المستندات و الشهادات المطلوب نسخه منها ، كمان لازم تصدقها من المختار انها طبق الاصل.

بدك شهادة ميلاد الك و لمرتك، كمان شهادة تطعيم ضد الكوليرا، و شهادة المدرسه، و شهادة من محل شغلك ، و كوشان الوطاه و الطابو تبع الدار. و رخصة السواقه ، لا تنسى تجيب شهادة الصلاحيه الفنيه يعني فحص البول و فحص الدم و العيون بلاش فحص البراز لانه ما في عمره حدا نجح فيه.

و هاك دفتر عبيلي فيه: اسم اخوانك و نسوانهم و خواتك و رجالهم و اولادهم و بناتهم،
و خوالك و خالاتك و عمامك و عماتك و نسوانهم او رجالهم و اولادهم و بناتهم.
و كمان نسيابك و اخوانهم و خوالهم و خالاتهم و عمامهم و عماتهم و اولادهم.
و عدايلك و اولادهم و عمامهم و عماتهم و خوالهم و خالاتهم و اولادهم و بناتهم.

حظرت كل المطلوب و اعطيته لقلم المخفر.
الشاويش قلي انو راح يستعجلي في المعامله ، و يعني اراجعوه بعد سبع اسابيع.

يا أبو يوسف، كل ما اسولف مع حدا بقلي عادي ، انا سويت هيك و هاي معي تصريح ، راح توخذه بس بدو وقت، يا زلمه زعران و بلطجيه و حراميه و اولاد حلال معهم التصريح. حتى صاحب البار معه تصريح و امام الجامع كمان.
بعد سبع اسابيع ، رحت لعند الشاويش، اول ما وصلت لعندة، و حتى ما رد على سلامي، نادى على العريف و صاح بيه، يا ابو اسماعيل خذلي ابو فتحي و حطوه بالنظاره ،
شو في؟
ليش يا عمي؟
شو سويت؟
لويش؟. و كله عالفاظي، ما حدا جاوبني.

بعد ثلاث ايام، اخذوني على غرفه بدون شبابيك ، قاعد فيها زلمه لابس مدني و محترم ، شكله مش من قريتنا.

اسفين يا ابو فتحي تأخرنا عليك، يس ما إنته عارف اجراءات، و طبعا انا مش عارف ولا مستوعب و لا فاهم ولا ايشي. قلته ابدا، ما في اي ازعاج . و طبعا انا من جوه بغلي و بسب عليه و على المظافه و عالساعه اللي قدمت فيها الطلب.

يا ابو فتحي ، جاوب و تعاون ، ترى احنا بنعرف كل ايشي.
تمتمت : طيب لما بتعرفو كل ايشي لويش بتسألني؟
انا بدي اسمعها منك. قلي يا ابو فتحي، من سنة ١٩٧٤لسنة ١٩٧٨. كنت مع جبهة التحرير الاوزبكيه. كنت و لا لأ. اعترف.
قلتلو حبيبي بدون صراخ، اه كنت، مهو حتى المختار كان و نص موظفين البلديه كانو.
وقف المحترم ولف حوالين الكرسي و قال : و الله طلعت مش قليل يا ابو فتحي. و فيلسوف.
انت ما الك تصريح عنا. و المظافه مش مسخره ميشان اشكالك تدخلها ،
روح انقلع ما الك تصريح عنا، احمد ربك انو المختار شغلك و عشت زيك زي غيرك، روح روح هسا على بيتك، و كل شي صار هون بتنساه و ما بتجيب سيرته.

يا ابو يوسف ، انا من هالقريه اعشق سماها و ميتها و ارظها و عرظها و كل ايشي فيها، انا القريه و مزارعها و بيادرها و حاراتها كلها مظافه الي ، و بدون تصريح.
ها عمي ابو يوسف، مش انا قليل عقل اللي بفكر ادخل هالمظافه اللي بدها تصريح.