لافاش كيري ..

15-02-2014 11:50 AM

تعديل حجم الخط:

بقلم : د. فاضل الزعبي
كرهتها و كرهت كل الجبنه ...
ساعات سيسكو او سيكو بطلت البسها من ورا حركات سيسكو القرعه في نهاية الستينيات ...
وروجرز في أول السبعينات ذبحنا ...و اجا كيسنجر يجرب خططه و احلامه فينا ...
حتى بوجيات بوش بطلت اركبها على سيارتي ... و رميت كل خرايط الطرق اللي فيها ... من ورا بوش و خارطة الطريق ...
و كل واحد اتشاطر علينا و تفلسف براسنا ... سموا مصايبه مبادره و لا خطه و لا خارطة طريق ...

مالك حامي يا ابو عناد ....
يا ابو فهمي ... خلونا نكره اسماء كثيره الها معاني ... معاهم صار معناها اجرامي قاتل ...
كلمة توطين ساميه مربوطه بصنع وطن للي ما الوه وطن ...
استعملوها للبدو حتى يبطلو رحيل و وطنوهم. و احنا و البدو مبسوطين. لانوه الهدف سامي. صارو من ورا التوطين الهم مدارس و مستشفيات يتعلمو و يطببو و ينتجو و جنود يحموا القريه...
يعني خلص ابو العبد ما اله وطن ....
طيب ما لقيتو غير هالقريه فقيره و محتاجه و مارستو دور شيلوك عليها و بدكو تقطعو من لحمها شقفه تسدو المصاري المحتاجه الها ...

طيب لافاش كيري بده يخدم ابو داود على حساب ابو عناد و ابو عناد ما عندو خبر ...
ابو عناد زلمه طيب من الانصار ... و بحب ابو العبد .. مهو خال اولاده ..و ابو العبد كل قرايبه مناسبين ابو فهمي و ابو عناد ...
و كمان ابو العبد من المهاجرين مكيف على هالسولافه ... و من كثر ما قرف من ورا الكبس اللي واقع على راسه بطلت تفرق معه ... المهم يريح راسه ...
و ابو داود مكيف و هاي المطلوب ... وهو بيصنع جبنة كيري ... و المهم يخلص من ابو العبد و لو يطلع بايدوه ليسكنوه في تمبكتو ...

ليش بتعاندوا مشيئه رب العالمين. سبحانه مقسم الارزاق ... خلق هالقريه بسكان على قد مياتها و قروشها و سماها... و الها تاريخ موغل في القدم ...
البتراء عاصمة الادوميين و الانباط و مركزا هاما لتجارة القوافل في القرن الرابع قبل الميلاد...
و العموريون قبل 3000 سنه من الميلاد .... و مملكة جلعاد من نهر اليرموك لنهر الزرقاء ... و مملكة عمون من نهر الزرقاء لنهر ماعين ... و مملكة مواب جنوب نهر ماعين...
و أرض مديان من العقبه الى مؤاب الى طور سينا ... هاي كمان مش تاريخ...
عصيون جابر.... المينا اللي هسه صار العقبه و اللي كان اخر محطات الموسويين قبل وصولهم الى برية صين... و كانت اهم مينا للملاحه في البحر الاحمر زمن سليمان....
انطلقت الدعوه العباسيه من محافظة معان ... و بدايه التحكيم بين امامنا علي كرم الله وجهه و معاويه اتفقوا عليها بنفس المحافظه..
لم يبني الرومان مدنهم في الصحراء. و في مناطق مقفره غير ماهوله ... طبيعي حتى مواد البناء و الديكور لم يستوردوها من روما ... و العمال المهره اللي بنوا كمان ما استوردوهم من سيريلانكا ...
يعني هذول جدودنا ما الهم حوبه ... هالقريه ما بشفعلها تاريخها ....

انتو عارفين انو تاريخيا ما في قريه تم التامر عليها قد هالقريه ... و عمرو ما نجح اي مبادره او مخطط او خارطه ... لانو الله حامي هالقريه و حاميها بشيخها و بابو عناد و اصحابه ... و الله ابو عناد ما بحب لافاش كيري و لا رح يوكلها حتى لو دهنوها بزبده و عسل ...

بقول للي شاف انو اغرقت بالرمزيه بهالموضوع ... المعلومات اللي في هالمقال مستقاه من كتاب العرب و اليهود في التاريخ للعلامه اليهودي اللي اسلم احمد سوسه رحمه الله ... اقروه بتعرفوا شو هالقريه و مين هي ...