بقلم : د. فاضل الزعبي
احب الفيلسوف ابو نادر (وهو عالم في مجاله) ان يخوض تجربة فريدة ... فدعى احد جيران حيه القديم (ابو فهمي) الى رحلة في البرية ...
استعد ابو فهمي الامي الذي لا يعرف القراءة والكتابة - ولم يسمع قط بعلم اسمه الفلسفة – لمرافقته ...
جابوا الغابة القريبة من القرية وهم في قمة الانسجام ... انسجام الفيلسوف المستمع بحديث الامي الجاهل وما وقف ضحك على كل تصرفاته...و ابو فهمي فرح بأن حديثه يضحك الجار المتعلم ...

في اول ليلة في البرية .... نصبوا الخيمة ... واوقدوا النار ونامو فرحين سعيدين بهذا الجو ..
منتصف الليل ايقظ ابو فهمي .. الفيلسوف العالم ابو نادر من نومه ... وقال له انظر لفوق .. انته شايف اللي انا شايفه ...

استغرب ابو نادر الفيلسوف من سؤال ابو فهمي في هذا الوقت بالذات ...
• يعني معقول يا ابو فهمي مصحيني من نومي ميشان تقلي شو شايف ..
• انا شايف سماء مليانة بالنجوم ...
• ابو فهمي قاله كمان انا شايفها .. بس شو يعني ..
• الفيلسوف قاله يعني انه الجو صحوا وغدا سوف يكون يوم جميل ...
• بس هذا الي شايفه يا ابو نادر .. شو يعني شو كمان شايف ...
• يا ابو فهي شايف قدرة الخالق على صنع الكون و صنع هذه المجرات وسبحان الخالق ...
• يا عمي يا ابو نادر كمان شو يعني .. و شو شايف كمان...
• لا تجنني يا ابوفهمي ... شايف جو شاعري للشعراء لكي يكتبوا اجمل القصائد واحلى الاغاني ...
• بس هذا اللي شايفه .... يا ابو نادر ...مش شايف ايشي كمان ...

ابو نادر ولعت معاه ... وصاح ايوه بس انته شايف غير اللي انا شايفه... حل عني بدي انام....
ابو فهمي ... همهم وقال .... يا ابونادر مش شايف انو الخيمة انسرقت واحنا نايمين في العراء.
انسرقت الخيمه يا فيلسوف النجوم ....!!!!!!!

يا سلام ... يا حبيبي لما يكون شلة المختار من فصيلة هالفيلسوف ... علمه فصله عن الواقع ... واصبح يعزف سيمفونيات في بلد الربابة والمهباش .... اصبح يأكل الكافيار في مطعم هاشم ... صار عزيزنا يلبس السموكن في مظارب العربان ... انا بتذكر برنارد شو الفيلسوف الساخر لما قال شو الفرق بين لم؟؟ ولم لا؟ ... يعني الفرق بين ليش؟ وليش لا؟

انفصال تام عن واقع القرية .... عن بياع السجائر عالاشارة الضوئية .. وعن بياع الشاي في سوق السكر .. وعن بياع الفلافل في وسط البلد .. وكمان عن بياع الفالصو في سوق الحميدية...
ابو نادر بشوف السيجار الكوبي ... وابو فهمي بدور على قمع السجائر عند موقف الباصات....
ابو نادر ما بيفهم ليش الناس بتشرب الشاي عالرصيف ... و في كابيتشينو لذيذ في احلى كوفي شوب..
كمان ابو فهمي عنده سوق منكو وشارع الوكالات في النهاية يؤدي نفس الغرض ... بس ابو نادر لا ...
مشكلة ابو فهمي انو صح وما حدا بيسمعوا ... اما الفيلسوف فغلط والكل بيسمعوه ..

ابو نادر مش قادر يشوف القرية من ورا نظاراته كعب الفنجان...
ابو نادر هوه اللي بيفلسف رفع الاسعار للمختار زي فلسفته للنجوم وشاعريتها ...
وما قدر فهمه وعقله يدله على الخيمة المسروقه.
ابو نادر هوه اللي بييع مجلس و كسارة و نبع القريه.. و برضه ما شاف الخيمه المسروقه و هوه ملهي بجمال النجوم ...
ابو نادر هوه اللي فرض ظريبه عدخول المظافه و ما انتبه انو الخيمه مسروقه و انو نايم في العراء و ما في ايشي يغطيه ..

خلطة ابو نادر وابو فهمي زي خلطة الزيت والماء ... مش ممكن تزبط ...
الفيلسوف ديفيد تورو قالها من زمان .. اذا بنيت قصورا في الهواء .. فان عملك لم يضيع .... لان مكان القصور هو الهواء ... لكن لا تنسى ان تضع تحتها الاساسات..
يسعدك يا ابو فهمي كيف حطيت الاساسات قبل ما تبني القصور .. ورح ييجي اليوم اللي تبني القصور وتكون انت المختار .
*** ديفد هنري ثورو، مؤرخ و فيلسوف و مؤلف أمريكي .. مقاوم للضرائب و داع للعصيان المدني و مدافع عن العيش البسيط ***.