بقلم : م. محمد سعيد سليم
اتوقع كمان كم سنة ما اشوف الا و تلفون يضرب على اهلي " الوو .. احنا جايين نطلب ايد ابنك المحترم لبنتنا !! " .. أو اكون في مكتبي و تيجي صبية " مرحبا محمد ممكن تلفون بابا عشان اهلي يجو عليكم يشوفوك !! " أه ولله ما "بهذرب" ....

" ببلش أهذرب " لما احكي اني رح اشتغل و اكون حالي و اروح اتجوز .. قولتك على وضع رواتب الموظفين الشباب بقدرو يصرفو على حالهم " دخان ، مصروف بنزين ، شفرات حلاقة " ؟؟؟ اي منيح منه الشب لاقي مشط يمشط شعره فيه .. ولأ المشط كمان مش اله بستعيره من اخته .. وبترضاش تعطي ياه .

مبارح رحت اقدم " سيرتي الذاتية " لأحد شركات الهندسة .. وصدف بنفس وقت مقابلتي مع مدير التوظيف وجود أحد الصبايا " باربي " ، فدار حديث قصير بينا كقصر " التنورة " ..

مسخسخ : رمضان كريم ..

باربي : الله اكرم .. ييي شو شوووب .. ( وطالت المراية و بلشت " أمنشن" )

مسخسخ : آه .. شووب !! - في عقلي بسأل " معقول جاية تقدم على نفس الهندسة اللي جاي اقدمها " ؟ ... ( هون بلش دهائي و فطنتي ) .. لو سمحتي ممكن تساعديني في تعباية بعض البيانات ؟ ( مع العلم ملف سيرتي الذاتية "ملغم" شهادات و دورات ) ..

باربي : هيهيهيه انا عم بستنى مين يساعدني .. مو فاهمة شي منو ..

- صفنت هذيك الصفنة اللي بتقول " هااا وش تقولين " .. وسألتها : هههه انتي مهندسة ؟

باربي : إي مهندسة .

^ من بعيد اجا موظف الإستقبال : " بش مهندسة " الأستاذ بنتظرك .

- مر 10 دقائق .. وطلعت باربي من عند المدير و طالت "حبة سنيكرز " : هاي حلوان التوظيف .. ( رمضان غايب اليوم؟؟ .. بس شكلو الأستاذ كثير محترم و رح يوظفني )

^ موظف الإستقبال : " أبو الشباب " ( مع كشرة ) اتفضل على مكتب الأستاذ ..

حملت أوراقي و شهاداتي و دخلت "حوت" على الأستاذ .. و بلشت أحكي عن خبراتي و شهاداتي و سنوات عملي و سفراتي .. و أحكي و أحكي و أحكي .. " أوك مهندس الراتب كذا .. ( طبعا خجلان احكي ) .. و رقم تلفونك موجود على السيرة بنحكي معك وقت حاجتنا .. شكرا "

" وليه بتقصر تنورة ليه بتقصر تنورة .. تتوظف أولى من الشباب و اييييييييه "

سمعت عن "فيتامين واسطة " .. اللي هو توصية من صديق مقرب أو احد أفراد عائلة الأستاذ أو "قرايب حبايب أحنا اولى من الغرايب " .. بس أول مرة بعرف انه مفعول " فيتامين التنورة أقوى " ..

وفي دراسة أمريكية تقول " فيتامين التنورة رفع نسبة البنات الموظفات في الدول العربية " ... طيب لييش ؟؟ طيب شهداتي و خبراتي؟؟ طيب البدلة ام الـ70 ليرة ما الها فيتامين ؟؟ وين اروح بحالي .. أنا شب و عم أسس حالي ..

طيب اذا توظفت .. و أخذ الـ209 ليرة .. على ايه ولا ايه ولا ايه رح اصرفهم !! .. وزميلتي بنفس المكتب بتوخذ ضعف راتبي مع سيارة فيها "كندشن "و شاليه و ليلتين في البحر الميت *مع العائلة ..

^المهم ما علينا .. الآن .. قبل نفاذ الكمية .. شاب أعزب بدون شغل مهندس مع كمشة شهادات عنده قدرة على تعلم الطبخ و الغسيل و الجلي فقط بـ99 جنية مع مصاريف الشحن .