بقلم : محمد المحيسن
عمو ليش انت بتحكي كثيرررر...
لأول مرة ابنتي لين تتمادى في اللفظ مع شخص اكبر منها عمرا
ولا اردعها...
كانت البداية عند خروجي انا ولين الى السوق لشراء مستلزمات العام الجديد وشاء القدر ان تتعطل السيارة ونحن في طريق العودة ولم يكن لدينا اي خيار الا ان نركب سيارة اجرة (تاكسي) وفعلنا ذلك..
ركبنا مع سائق تاكسي مثل ما بحكوها لا بنعرفه ولا بيعرفنا بس شو زي كانه احنا اكثر من قرايب وبلش الحوار بكلمة بدي اشغل المكيف وما شاء الله اشتغل هو والمكيف طلع كمان هو 2 طن
ما سكت الله وكيلكم طلع معاه متلازمة حب الفضول و عنده من القصص والبطولات ما عجز عنه التتار والمغول و شفته محلل سياسي وناقد اجتماعي و كوميديان كمان
كل هالشي وانا زلمة اللي راكب معه ومعي بنتي كيف لو كانت بنت لحالها شو بدو يصير فيها...
ليش وصلنا لهاي المرحلة ليش ما في ضوابط تردع السائق وتجبره على عدم الاحتكاك بالركاب - ما بعرف شو الضوابط- بس لازم
شو ذنب فتاة مسكينه تقطعت فيها السبل تكون صيد ثمين لسائق ينظر لمركبته انها شبكة تنتظر من يعلق بها ليحيطها بلسانه الطويل ...
مش عارف حاب اوصل لمرحلة اسمع فيها لما افتح باب سيارة الاجرة صوت بيحكي هاي الرحلة مصورة لغايات ضبط الجودة
كبيرة صح ..بس والله صغيرة جنب رواياتهم
وانت يا قلب ابوكي يا لين يسلم البطن اللي حملك لانك فشيتي غلي وحكيتي اللي انا استحيت احكي بالرغم انه هو ما استحى ولا رح يستحي ...