بقلم : المهندسه امل الرومي

ربنا خلق الناس وخلقلهم قلب ينبض بالحياه بس الغريب انه احنا البشر بتصرفاتنا حجمنا هالقلب
وب ولوناها عل قولة فلان قلبه كبير وفلان قلبه صغير
القلوب صارت تتلون وصارو يقولو فلان قلبه ابيض ، فلان قلبه اخضر ، والثاني قلبه اسود .
والله وكيلكو القلوب صارت زي الدكاكين بما تحتويها

القلب الابيض مثل دكانة الألبان والأجبان والشنينة كل شي فيها ابيض وستانلس ستيل وبلمع ..
بس بتكون منتجاتها حساسه للغايه ومدة صلاحيتها محدوده وأي شائبه تنسفها نسف وتخرب كيانها ، وهيك هم اصحاب القلوب البيضا .. المؤثرات تنسفهم وتجلطهم ووتنزع بياضهم .

القلوب الخضرا .. يا عيني يا عيني زي محلات بيع الخضره كل يوم لازم تجدد البضاعه عشان يصير عليهم اقبال وهذول مرتاحين لانه الي عاجبه يوخذ والي مو عاجبه يخلي ، إن أخذ ربحان ، وان خلا مش متأثر لأنه بصرفها بمعرفته ودايماً هذا اللون يلوق للختياريه , نقول : ختيار قلبه اخضر يعني لسه فيه دم ومُقبل على الحياه وما يهتز بأي اشي .

أما القلوب السودا .. فهاي زي محلات البنشرجيه والميكانيكه سودا ومشحمه وبدها تعزيل ، والي يفوت يعزلها يتشحبر وما يقدر ينظفها لانها ليطت وما الها حل الا تنَسف وتبدا بداية جديده ، فالأفضل ما تقرب منهم ولا تحاول تصلحهم ، ربهم تدبر فيهم وأضعف الايمان تدعيلهم ربنا يصلحهم ..


وفي قلوب ما الها لون زي المي .. هاي ما تقدر تحزر عليها من جوا شو هي ، مثل البنوك خزاين مسكره ، الوان مش مفهومه ، ورموز ومفاتيح بأيدين صحابها .
وعشان تقدر تتعامل معها لازم تفك الشيفره بالأول وتقرا عليها ويمكن تزبط ويمكن ما تزبط .
بس أقلها حاول تُدخللها من الصراف بالاول لأنه زي ما قلنا نظامها نظام البنوك وهذول صرافهم #مصالحهم
وقلوبهم ماكنه مبرمجه ما فيها احساس
وسلامه تسلم سلامتكو

Email address : Amalromi97@gmail.com