بقلم : المهندسه امل الرومي

متعب شاب بسيط ومن عيله كمان بسيطه لدرجة انه البساطه طالعه من خشومهم

دور شغل بالبلد لما داخ وما زبط معه اشي لحد ما الله فتحها عليه وقرابته سحبه لعنده عل الخليج بلاد النفط والمصاري المتلتله.
قرر متعب انه يسافر عل الخليج عشان يشتغل ويجيب مصاري يبني بيت ويتجوز ويشتري سياره ويجيب للحجه سخانات قهوه ياباني اصلي وبخور وقماشة ثوب من الدف الاصلي ويجيب لخواته عبايات وكريمات.

تسهل متعب واللون الوردي يغطي احلامه وحلق وصار شايف حاله راكب جيب وصل متعب على بلاد الغربه وصار يشتغل ليل مع نهار عشان يحصل فلوس تؤهله انه يصير شبه خليجي .
لكن مع الايام الي بتمر بسرعه متعب بكتشف انه مش دايما السولافه جايبه همها وانه مش كل الاحلام الورديه رايحه تتحقق وانه في منها (الاحلام )قلب على زراق(لون ازرق ) فيضطر انه يتنازل شوي شوي عن اهدافه .

يعني بدل ما يتجوز ويعمر بيت صار بده يتجوز او يعمر بيت وبدل ما يجيب لامه سخانات ياباني يستبدلها بالصيني ماركة السيف.

بس في شغله وحده ما بقدر متعب يتنازل عنها (مش بيده غصبن عنه) وهي الكشخه اللي بده يكشخها لما ينزل على الاردن لانه ما حدا رايح يرحمه كلهم رايحيين يفكروه يلم ويقش المصاري من الشارع.

وبهيك حاله هو مجبر يكون عنده شماخ وثوب واكثر من بيجامه وشبشبين كعب عالي وبنطلونين وعلبتين عطر عشان يستحليهن عمه او خاله في نهاية الاجازه ويوخذهن ومن هالسوالف

ينزل متعب اول اجازه بتخلص تعليلة اول ليله بعد ما يجو القرايب يسلمو على متعب وبعدها على طول يدعو الحجي والحجه ابنهم الخليجي متعب الى اجتماع قمه طارئ بالمضافه واهم محور يطرح بالاجتماع وهو سؤال قوي مضمونه ¬- شو رايك ندورلك بنت حلال ونزوجك وتكمل نصف دينك - طبعا متعب يتعزز رغم انه شاطه ريالته بس مش قادر يقول ما معي مصاري ولا قادر يشرحلهم المقلب الكبير الي اكله ومع هيك بقولهم اه دورولي انا موافق .

وبهيك الحجي والحجه بكونو انتزعو منه اول قرار وهو الزواج دون أي دراسه لوضعه.

في الحلقه القادمه بنكمل