بقلم : المهندسه امل الرومي

وتستمر مسيرة متعب المتغرب ولكن الان بشكل مختلف تماما فما عاد متعب وحيدا من الان اصبح لديه زوجه تؤنس وحدته في الغربه وتحسسسه بالأمان الاجتماعي الذي كان يفتقده خلال فترة الغربه.

لكن يا ترى هالأمان اللي حصل عليه والونس ما الهم ثمن؟ طبعا الهم ثمن كبير وكبير كثير

اصبح هناك في حياة متعب زوجه تطالب بحقوق معنويه وماديه هسا المعنويه مقدور عليها كلمتين حلوات وصلى الله وبارك .
اما بالنسبه للماديه فهاي بدها فت خبز كثير لانه الزوجه العزيزه ما اسمها الا عايشه مع زوجها بالخليج يعني ذهب وعطور مكياج ماركات عبايات قماشه فاخره غير المشاوير والروحات والجيات والمطاعم والكشتات الرحلات))

متعب مش بخيل وما عنده مشكله بانه يرفه شريكة حياته بس يا ترى لاي مدى بقدر ينفذ هاي الطلبات وما بده ينسى انها زي ما بتحب لحالها بتحب لخواتها وبنات خالاتها وقراباتها.

حتى تقول لهن انه بحبها كثير وما برفضلها طلب وانه غني كتير كتير (سلطان بروناي) )

بعد سنه من الزواج والاستقرار قرر متعب ينزل اجازه على اهله وقرايبه فبدء هو وزوجته يحضرو الهدايا اللي بدهم ياخذوها معاهم.

صارو كل يوم يكتبو قائمه يشتروها بعد ما قررو انهم لازم ياخذو لكل بيت من الناس اللي بيعزو عليهم شغله وحده ما خف وزنه وغلي ثمنه واعتبار هذه هديه بسيطه تعبر عن اشتياقهم للاهل والاقارب.

وصار ونزل متعب اجازه وصارت الناس تيجي تسلم عليه وتسهر معاه تحت معرش الدوالي و يمضوها يسولفو كل ليله لوجه الصبح عن الخليج ومن هالسوالف.
ومن جهه ثانيه زوجة متعب كل يوم تلبس دشداشه خليجيه شكل وتستقبل هالنسوان وتعرط

عليهن سوالف اشكال الوان وناسيه ومتناسيه انها (ما صارلها بالقصر غير امس العصر )

ما يتخلل هذا العرط من زمجرات ذات صوت خفيف وجحرات من ام متعب وخواته وبدهن بين لحظه والثانيه يقوللها لولا الحيا والمخاجله (كنا بقاع القفه وطلعنا لبره )

بس على مين؟ زوجة متعب متمكنه من موقفها وماسكه زمام الامور وما بقدر حدا يطب بساحتها وخصوصا انه امها دايما على يمينها بتقدم النصح والارشاد على مستوى عالي ومتميز ومتعوب عليه.

اجا دور ردة الفعل على الهدايا #

خالته قالت الثوب اللي جايبلي اياه والله ما بشتريه بليرتين اكيد هذا قماش ستوك عندهم بالخليج وابن اختي بضحك علي (_طبعا مهو ما اخذ بنتها وتجوز وحده ثانيه)

عمته قالت السخانات اللي جابهن يبردن والقهوه بتصير فيهن ميه (طبعا مهو اخذ شهادات ابنها على اساس يوظفه ويدبره عنده بالخليج ولحد الان ما رد خبر ؟

امه وخواته ما عجبهن الهدايا اللي جابهن (طبعا بالمقارنه بمرته اللي ما خلت ولا بقت لحالها ولخواتها)

ابوه واخوانه ما عجبهم لا العطر ولا الساعات (طبعا لانه المفروض يكون الدعم كاش عشان يتجوز اخوه ) وهلم جرا --------وحزين يا متعب منين بده يلاقيها ولا منين

الشخص الوحيد اللي راضي على متعب هي حماته بس طبعا كلنا بنعرف انه هذا النوع من الرضا ملغوم باي لحظه يتم نسفه ولاسباب ما بعلمها الا الله
والحلقه الجايه متعب بيجيه ولد ونشوف شو بده يصير
وسلامه تسلم سلامتكو