بقلم : هاشم الخالدي
ربما هي المصادفه التي اضحكتني حد البكاء وانا استمع اليوم لابنتي فرح ذات السبعة اعوام وهي تروي لي قصة " مناكفه " حدثت بينها وبين زميلتها في المدرسه قبل ايام .

بدأت الحكايه بوشاية من ام العيال " ام زيد" التي فاجأتني بالقول : تعال شوف بنتك فرح شو عامله.

سالت فرح : خير اللهم اجعله خير شو صاير معك بالمدرسه.

قالت : بصراحه بابا من كم يوم تزاعلت مع صاحبتي " زينه " لاني لما دخلت الصف لقيتها قاعدة بدرجي " المصطلح يعني الكرسي الخاص بي ".

تتابع فرح : تناكفنا .. كلمة منها كلمة مني فحكيتلها ... حبيبتي انتي مش عارفه مع مين بتحكي .. انا بنت هاشم الخالدي .

قلت لفرح .. ومين دخلك هاشم الخالدي ... يا بابا انتي بدك تعملي زي عصام .. اي هو انا ناقصني .

اكملت : يا بنتي كل الناس خير وبركه وما بيصير تضلي تحكي لصاحباتك انتو ما بتعرفوا مع مين بتحكوا ؟؟

تكملة القصه المضحكه حين اكملت فرح الحكايه : يا بابا مهو كمان صاحباتي بحكوا نفس الشي معي .

استدركت طالبا تفاصيل منها ..
قالت لي : قبل ايام دخلت الصف وتناكفت مع زميلتي " آيه " وحين احتد النقاش بيننا قالت لي : انتي ما بتعرفي مع مين بتحكي .. انا بنت فلان الفلاني ؟؟
اكملنا النقاش فسالتها : طيب بابا انا شو بشتغل ؟؟

قالت : صحفي بموقع سرايا وكل " مساتي " بمعنى معلماتي .. بتابعوه وبيشوفوا مقالاتك .

سألتها التمس اجابه فلعل الخطأ مني منذ البدايه قلت لها : وهل سمعتي مني انني قلت مثلا على الهاتف لاي شخص " انت مش عارف مع مين بتحكي ؟؟

قالت : لأ بابا بس اغلب البنات بحكوا هيك عن " ابهاتهم" لما بتصير اي طوشه بين البنات.. دايما بحكولنا .. " انتو مش عارفين مع مين بتحكوا ؟؟

اكتشفت من خلال الروايه ان اطفالنا مصابون بفايروس اسمه " انت مش عارف مع مين بتحكي لذلك فالحكايه ليست حكاية عصام او امين ... انه الفايروس الذي يجب ان نخلص اطفالنا من ان يقتحم حياتهم حتى يدركوا ان العزه والجبروت لله وحده.

يعني الله ستر انو بنتي فرح ما بشتغل بالديوان الملكي واشتبكت عالطريق مع سايق جت كان اكلنا هوا .

الكاتب : مؤسس موقع سرايا
Hashem7002@yahoo.com