سرايا - وصلت سرايا رسالة من احد القراء يريد حلا وتاليا نص الرسالة:

سرايا - رورو - اريد حلا صباح الخير للجميع - انا بنت عمري 32 سنة بعيش لحالي في بيت اهلي - ما كان الي ارتباطات سابقة وامي وابوي متوفين واخواني وخواتي متزوجين - اشي قريب مني واشي بعيد بس الاغلب بعاد انا بشتغل محاسبة واموري الحمد لله جيدة يعني على الاقل ما بحتاج حد لا يصرف علي ولا يحملني جميله بس بصير معي شي كل ما بصير معي قرشين بتداينوهم اخواني وبصير يرجعولي اياهم بالتقسيط وما بحس يقيمتهم ولا بستفيد منهم مشان هيك من شغل 8 سنين مو عارفة احوش ولا اعمل شي جديد بحياتي - ومن جديد صرت كثير افكر ببكرة وبالوحدة - الزاوج الي شي ثانوي بس لمتى - بكرة لما يمشي فيي العمر شو رح اعمل لحالي - صرت احس بملل كثير بحياتي - صار نفسي يصير شي جديد بحياتي او اعمل شي لذاتي - صرت افكر بشكل جد وادعي ربنا يبعتلي ابن حلال اكمل معه العمر اللي باقيلي - انا فقدت والدتي من شي سنة ونص وجودها معي ما كان مخليني افكر بشي ثاني كنت بس بدي اسعدها وما اخليها تحتاج حد وفعلا الحمد لله بفضل الله ما احتاجت حد عاشت كريمة وماتت كريمة وهاي اكبر نعمة بحمد الله عليها - احكولي شو رايكم بحكايتي