فيديو .. حمادة هلال ينهار عند مشاهدته صورة أمه: أخفيت عنها إصابتها بالسرطان

17-10-2020 08:47 AM

تعديل حجم الخط:

سرايا - انهار الفنان حمادة هلال بشدة عندما شاهد صورة والدته ودعا لها بالرحمة قائلاً، "الله يرحمها عاشت حياة صعبة أوى وكانت ضهر أبويا في كل حاجة، وكانت مممكن متاكلش عشان إحنا نتعلم وعلمتنى إزاى أحافظ على النعمة وأزاى أحب أخواتى وأحافظ عليهم".

وأضاف هلال خلال لقائه مع الإعلامى عمرو الليثى ببرنامجه "واحد من الناس" على شاشة الحياة، "أمى فضل عندها مرض السرطان 3 سنين ومكنتش تعرف لأنى محبتش أعرفها، وده اكتشفناه لما قالتلى صدرها واجعها ولما روحنا للدكتور فقالى أن عندها "سرطان" وطلب نعمل تحاليل وللأسف لقينا السرطان فى كل جسمها".

الأم سند و متتعوضش...حمادة هلال يحكي عن الأيام الأخيرة لوالدته قبل وفاتها
الأم سند و متتعوضش...حمادة هلال يحكي عن الأيام الأخيرة لوالدته قبل وفاتها #واحد_من_الناس #قناة_الحياة
Posted by Alhayah TV on Friday, October 16, 2020

وتابع، قائلا: "طلبت من كل اللى موجودين فى المركز إن يفهموها انها بتتعالج من هشاشة عظام بسيطة وان كل اللى بتاخده فيتامينات، ولما قالى هاندى كيماوى ولكن رفضت وقلتله شوف البديل فقالى الهرمونات والأدوية الذكية، وفعلا بتروح تاخد العلاج وتقولى انا حاسة انى تعبانة فكنت بفهمها أن ده لازم عشان الأدوية".

واستكمل، "بعدها بشهرين والدتى تعبت تانى والدكتور قالى انا مضطر أديها كيماوى ولما حصل لقيت شعرها بيقع فقعدت أفكر فى أى فكرة وفهمتها ان دى صبغة حطيناها بس وقعت شعرها وصدقتنى لانها كانت بتصدقنى فى أى حاجة، وأنا مكنتش بكذب عليها ولكن عشان كان نفسى تقعد معايا أطول وقت ممكن" .

وتابع، "ربنا متعبهاش فى آخر لحظات حياتها ولكنها دخلت فى فترة غيبوبة وتحس انها زى أكنها بقت طفلة ومش بتاكل غير فاكهة ومش حاسة بطعم أى حاجة، وكنا خايفين نوديها المستشفى بسبب الكورونا وبعد فترة روحنا المركز الطبى العالمى، ولكن جالى إحساس ان هى خلاص ماشية وروحت كلمت حد قلتله هاتلى كفن واخواتى ومراتى استغربوا جدا".

وأختتم حديثه، "أمى كانت موصيانى طول الوقت على أخواتى البنات وزوجتى لأنها كانت بتحبها عشان حنينة عليها أوى، ويارب يجمعنى بيها فى الجنة، ويارب يبارك لكل واحد امه عايشه ويحافظ عليها وياريت كل وقت قاعد معاها متركزش فى الموبايل وركز معاها هى وأملى عينك منها وحوش جواك هى فين لأن هايجيلك لحظة بعد الشر هتتمنى الوقت ده".