سرايا - أعلن الفنان نادر أبو الليف عودته للساحة الغنائية خلال الفترة المقبلة.

وقال «أبو الليف»: «الفترة الجاية هتبقي عودتي قوية وقاتلة وباستماتة كمان، وعامل شغل جديد، ومعايا فرقتي وهعمل شو خارجي، ومجهزلكم مفاجآت كتير».

وأوضح خلال لقائه ببرنامج insider بالعربي، أنه انتهي من مجموعة أغاني وسيقوم بطرح مجموعة أغنيات منفصلة كل شهرين، معلنا عن مفاجأة كبيرة بتعاون ودويتو مع مطربة شهيرة خلال شهر يناير المقبل، لافتًا إلى أنه حدثت مجموعة معوقات تسبب في عدم طرح أغنيته "عصبية" في الفترة الماضية، وسيتم طرح أغنية أخري بعنوان «مين يزغزغكم»، مؤكدًا أنه سيدخل في إنتاج أغانيه، مضيفا: «للأسف شركات الإنتاج مبقتش تنتج بيروحوا لمغنيين المهرجانات والسبب السعر وبياخدها ببلاش وده بيضايق أي فنان أو مطرب خايف على فنه، وحضارتنا، لكن الأستاذ هاني شاكر والحكومة شغالين ودورهم واضح في مكافحة الفساد في الوسط الفني، وحابب أوجه رسالة لفناني المهرجانات وأقولهم: بكل صدق وحب وأخوه إنت عايز تبقي فنان محترم ثقف نفسك الأول».

ووجه أبو الليف رسالة للفنانة شيرين عبد الوهاب وحسام حبيب مفادها: «حسام حبيبي جدا وشيرين حبيبتي جدا وإخواتي واتشرف بيهم ولكن اللي حاصل منهم مش حلو، إذا كانت شيرين أو حسام، مينفعش أنشر غسيلي قدام الدنيا كلها في خصوصية، أتمني منهم إن بابهم يتقفل عليهم، مهما كانت في الخلافات بينهم أو مفيش يمكن دا مصطنع يعلم الله ما في الصدور مفيش حاجة مضمونة وممكن دا بيتعمل عشان ألبوم شيرين اللي نزلته مثلا».

وأطلق مؤخرًا المطرب نادر أبو الليف أحدث أغانيه «عيب كدة» عبر صفحاته الرسمية بمواقع التواصل الاجتماعي، وموقع يوتيوب، احتفالا بالعام الجديد 2021، وهي من كلمات محمود شوقي وألحان معتز أمين وتوزيع بيرم ومكساج أسامة عبد الهادي، واقتربت من تحقيق مليون مشاهدة.