سرايا - سرايا - مرحبا انا فتاة عمري 27 سنة متزوجة و الحمد لله .....حاصلة على شهادة بكالوريوس في التسويق من الجامعة الاردنية مشكلتي تكمن في تخصصي!!!! فقد ندمت لدراسة هذا التخصص فمجال العمل فيه لفتاة غير مناسب إما مندوبة مبيعات ( وهذا لا يناسبني من عدة نواحي- الاختلاط و- التعامل المباشر مع الزبائن و -الرواتب الزهيدة التي تعتمد على العمولة بالاضافة إلى اشتراط مظهر معين للفتاة) أو العمل كسكيرتيرة براتب لا يكفي حتى المواصلات و بساعات عمل طويلة..

حاولت أن أقدم طلبات للمدارس سكروها بوجهي! تخصصك ما بفيدنا!

!فكرت الصراحة أرجع أدرس انجليزي تطبيقي (لغويات) بالجامعة الاردنية لأنه تخصص حلو و مطلوب بس خايفة ومحتارة من عدة أمور:

أولا: رح أدرس موازي يعني رح يكلفني كتير!!

ثانيا: أقل شي بدي 3 سنين يعني ممكن يجيني أولاد بهاي الفترة وممكن احتاج مدة أطول!!

ثالثا:هل اذا درست و صار معي بكالوريوس تاني رح تزيد فرصتي بالشغل ولا مش محرزة كل هالتعب و التكاليف؟

كمان كنت أفكر بخيار تاني و هو اني احترف اللغة الانجليزية عن طريق الدورات! و أصير أعطي دروس خصوصي و أترجم خاصة اني بحب التدريس وعندي جلد بس بتوقع اتقاني للغة مش رح يكون زي البكالوريوس!

بتمنى الي عنده خبرة في مجال الشغل في السوق الأردني و أصحاب التخصص يفيدوني خاصة  في مجال الدورات إذا فكرت أخد دورات متعمقة باللغة الانجليزية (بأي مركز بتنصحوني)؟؟؟

ومين أحسن خيار البكالوريوس ولا الدورات؟؟؟؟؟

 لأنه تعبت من القعدة بالبيت بدون شغل أو دراسة وحاسة حالي ما الي فايدة بالمجتمع!

مع العلم اني نشيطة و بحب الدراسة و التدريس عشان هيك متدايقة اني حاسة عندي قدرات لازم استغلها!!

 وشكرا