سرايا - سرايا - وصلت سرايا مشكلة فتاة ، وتاليا ً نص الرسالة :

فتاه عمري 17 سنة ، كنت بحب جارنا من وقت ما كنت طفلة وهو كان يحبني، هو عمره 20 سنة ، أهلي ما كانوا يعرفوا اننا منحكي مع بعض، المشكلة صارت بس رجع أخوي من الدراسة برا وشافني وأنا بحكي معاه، فضربني وحكالي ما أرجع وأحكي معاه، وضرب أحمد كمان وهدده إنه راح يقتله اذا شافه بحكي معي، و أنا و أحمد رجعنا نحكي مع بعض بعد أسبوع وأخوي شافني كمان مرة وحكى لبابا و أقنعه إنه نرحل من البيت و فعلا رحلنا وغيرت مدرستي وتغير علي الجو وكل اشي وأنا كل يوم بدعي إني أشوف أحمد ولو لاخر مرة.

بلشت حالتي تتحسن  وصرت أحاول أنساه لحتى إجا يوم خطبة بنت عمتي اللي بعتبرها متل أختي وأكتر، واكتشفت انه خطيبها هو أحمد نفسه.

أنا ما قدرت اتحمل وخصوصاً لإنه صرت أشوفه على الأقل مرتين بالأسبوع بس يجي يزور سلوى وصار يحكي معي من دون ما سلوى أو اي حدا يعرف واعترفلي انه بحبني أكتر من أي وحدة تانية.

قبل شهرين اكتشفت سلوى انه معها سرطان وأحمد فكر أنه يفسخ خطبته معها وصار يرن علي كل يوم ويحكيلي انه أتجوز  وأسافر معه برا.

 بعد ما اجى عرض شغل بدبي بنفس شركة أبوه، فأنا محتاره والله بين بنت عمتي وعيلتي اللي ما راح ينسو هاد الشي اذا عملته وبين حب حياتي اللي حرمني منه أخوي.

أرجوكم ساعدوني بدي حل عشان ما تدمر حياتي !