سرايا - وصلت سرايا رسالة من احد قرائها تريد حلا،وتاليا نص الرسالة:

السلام عليكم.بدي اطرح مشكلتي لاني تعبت من حياتي كتير وبدي ارائكم ومقترحاتكم بس رجاء بدون تجريح بالكلام ..انا فتاة عمري 27 سنة جامعية بشتغل بموسسة تعليمية مشكلتي قبل سنتين كان في رجل عمره 52 سنة بيجي بسأل عن بنته باستمرار وكان يدور بينا حديث عن وضع بنته بخصوص الدراسة وكنت بلاحظ اهتمام ونظرات اعجاب من ناحيته لحتى صرت افكر فيه باستمرار..وما زاد الموضوع اكتر من هيك.

المهم انا قبل سنة غير ت مكان عملي وانقطعت اخباره بس ما غاب عن بالي يوم .وبالصدفة قبل 4 اشهر طلب رقمي من زميلة الي بعملي القديم واعطته الرقم وحكى معي واعترفلي انه بحبني من سنتين واجت الفرصة وحكى الي بقلبه.

انا احترمت مشاعره بس رفضت اخوض هيك علاقة وخاصة انه متزوج..وضل كل يوم يحكي معي ويطمن علي..وما بعرف كيف مشيت علاقتنا من 4اشهر لهلا انا كتير حبيته ومن زمان وتعلقت فيه زيادة هو كتير محترم وطيب وحنون ونسيت فرق العمر بينا وانه متزوج..المهم قبل اسبوع رنيت عليه وحكيتله ننهي كل شي لانه مستحيل نكون لبعض..هو زعل بس حكالي رح يضل يحبني ويتمنالي الخير ..ولليوم ما حكينا..المشكلة مش عم بقدر انساه وكل يوم ببكي عشانه حبيته كتير .

انا الحمدلله بصلي وبقرا قرآن وبقوم الليل..ومستحيل اكمل هيك طريق..بس المشكلة مش قادرة انسى صورته ..شو اعمل نفسيتي تعبت كتير وتغيرت حياتي عن اول..هدا اول حب واول تجربة بحياتي كنت رافضة كل العلاقات..شو اعمل حتى انساه خايفة يطلعلي من جديد واحن لكل شي..بدي رايكم واقتراحاتكم بدون تجريح لانه هدا الي صار واسفة عالاطالة وشكرا..