سرايا - نشرت صفحة الفنان عاطف سعيد عبر موقع التواصل الاجتماعي (فيس بوك ) منشور كُتب فيه:" توفى إلى رحمة الله الفنان عاطف سعيد وصلاة الجنازة بعد صلاة العصر".

وكتبت صديق الفنان عاطف سعيد:"إنا لله وإنا إليه راجعون انتقل على رحمة الله تعالى منذُ قليل الفنان الأستاذ عاطف سعيد."

وأضاف" سامحوني على الكلام اللي هقوله ده لكن أنا حزنت حزن شديد لم عرفت الخبر كنت كل ما أعدي من جنب قهوة صدفة اللي جنب المعهد كنت ألاقي عم عاطف قاعد لواحده مهموم كان أول ما يشوفني يقول لي تعالى أقعد أشرب معايا شاي."

وتابع" أقعد معاه يقعد يشتكي ليا من قلة الشغل ويحكي ليا قد إيه هو بيحب الفن ومش عارف يعمل حاجة غيره رغم ظروفه الصحية والمادية الصعبة ويقعد يحكي ليا عن مواقف و وعود كاذبه بياخدها من نجوم كبار."

وأردف:" وإنه عايز ينزل تصوير بأي شكل وكانت آخر مرة شوفته كانت من حوالي أسبوعين كنت في تصوير ولقيته هو وابنه الي ربنا يتولاه من بعده في اللوكيشن بالصدفة فبسأله بتعمل إيه هنا يا عم عاطف رد وقال لي جي أسعى وأقابل المخرج والنجم فلان علشان كان قايل لي إنك معايا في المسلسل اللي جي و قال لي يا عمر أنا ممكن أعمل زي ناس كتير وأنزل بوست وأطلب شغل وأعمل زي كل الي بيعملوا كده النهارده لكن كرامتي متسمحش لي أعمل كده".

وأكمل:" وإلي مزعلني بجد إنه كان مكلمني من أسبوع كده وطلب مني إني أروح معاه لشركة لم عرف أن صاحب الشركة صديقي وأنا وعدته أول ما أرجع القاهرة هكلمه ونروح سوى وسبحان الله كان في بالي امبارح أن أكلمه وأقول له إني راجع خلال يومين لكن ربنا أفتكره عم عاطف كان راجل محترم ومكافح وعنده عزة نفس عم عاطف كان فنان جميل وقدر يعلم معانا بمشاهد بسيطه لكن اثبت وجوده بيها وطول ما أنا معاه كانت الناس لم تشوفه تجري تتصور معاه وكان يبقى فرحان اوي".

وأوضح قائلاً:" وسامحوني على كلمة عم لكن أنا كنت متعود اقولها له الاستاذ عاطف مات بحسرته لكن راح لربنا العدل وكان في كلام كتير لكن للأسف مش كل الي اتقال يتحكي ربنا يرحمه ويغفر له ويسكنه فسيح جناته ويلهم أهله وذويه الصبر والسلوان."


يذكر أن أبرز أعمال عاطف سعيد: حديث الصباح والمساء، ابن حلال، سلطان الغرام، سارة، الليل وآخره، عسكر في المعسكر، يا رجال العالم اتحدوا، عايزة أتجوز، ابن موت، أفراح إبليس.

وكان آخر أعمال الفنان الراحل مسلسل القمر آخر الدنيا الذي عرض ضمن دراما رمضان 2019.

• إقرأ أيضاً : نسرين طافش توجه نصائح للمطلقات
• إقرأ أيضاً : سيلينا غوميز المرأة الأكثر متابعة على انستغرام
• إقرأ أيضاً : بثينة الرئيسي توثق اللحظات الجميلة في كواليس مسلسل "قرة عينك"