سرايا - - حلّ الفنان الكبير فاروق فلوكس ضيفاً على برنامج "القاهرة اليوم" الذي تقدّمه الإعلامية نانسي مجدي عبر قناة "اليوم"، حيث كشف عن أسباب خلافه مع الفنان الراحل فؤاد المهندس والموقف الذي أغضبه منه.

وقال فلوكس: "فؤاد المهندس ده حالة خاصة بالنسبالي لغاية ما توفّاه الله، كنت بحبه رغم المواقف الكتير اللي عملها معايا مش حلوة".

وأضاف: "مواقف كتير بس أنا هقولك واحد منهم... كنت بشتغل في فرقة الريحاني بعمل رواية وبمثل بقالي سنتين الرواية والدنيا حلوة قوي... جه قاللي هعمل رواية أنا وإنت وعوض وشويكار... وقاللي خلص روايتك آخر أغسطس (أب) و1 سبتمبر (أيلول) هتكون معايا".

واستكمل: "قولتله إزاي أسيب المسرحية دي؟ قاللي هو كده أنا أستاذك وبقولك... وسيبت مسرح الريحاني ورحت عنده بناء على اتفاق إن أجري هيكون رقم معين... بعدها المؤلف تقاعس ومعملش الرواية أنا ماليش ذنب، إنت شيلتني من الفرقة وحطّتني عندك يبقى تدّيني مرتّبي".

وأردف فاروق فلوكس بالقول: "إدّاني شهر واحد بس والشهر التاني صلاح يسري كان قاعد بيقولّه فين أجري؟ إدّاني ضهره... مدرتش بنفسي بقى وقولت لأستاذ فؤاد قاللي ماليش دعوة... وطبعاً أي حد مكاني كان هيزعل زعل الدنيا".