بقلم : محمود قطيشات

لما كنت بالثاني ثانوي
بمدرسة السلط الثانوية
قدحني استاذ كف على
وجهي عمى ضوّي
ووقّع الحطّة والعقال عن راسي ...
لغاية اليوم ما عرفت ليش
لكن بالتأكيد انا تصرفت
تصرف ما عجبه
او أساء فيه ظني
بعد مرور اكثر من ٢٢ سنة
التقينا بالصدفة في عمان
كنا راكبين بسيارة سرفيس
هو بالكرسي الأمامي
وانا بالكرسي الخلفي
بصراحة انا عملت حالي
مش شايفه
كنت بعدني ماخذ خاطري منه
لما قرّبنا نصل العبدلي
مديت ايدي اعطي الشوفير الأجرة
حكى لي واصل
اثاري استاذي اللي انا حاولت اساوي حالي مش
شايفه ...
دفع عني الأجرة
والله اني ذبت بثيابي
من الخجل
هذه هي اخلاق المعلمين
الذين إذا خفتت انوارهم
ضاعت الاجيال
والشيء بالشيء يذكر
لما درّست بمدرسة سحاب الثانوية
بتذكّر حالي صفعت طالب كف
ومن حمّ الكف وقع العقال عن راسه
اجيت انا طلت العقال
عن الارض
وارجعته على راسه زي ما كان
بعد انتهاء الدوام
إجا عليّ وحكى جملة بعدها بتزّن براسي
حكى لي بتعرف يا استاذ
إحنا البدو لما واحد بضرب واحد وبنزّل شماغه وعقاله عن راسه
هاي تعتبر اكبر إهانة
وانا بعرف انه ما كان قصدك تهيني
بس انت جرحتتي قدام
الطلاب ..
وشكرا الك اللي رجعت ولبستني الشماع والعقال

قبل اسبوع
أجاني طلب صداقة من واحد
والله الاسم مهوش غريب
علي
تذكّر يا محمود
تذكّر .. تذكّر بالأخير
تذكرت
طلع نفس الطالب اللي انا
أخطأت بحقه
ضربته وطيحت عقاله وشماغه عن راسه
ورغم اني راضيته
وتأسفت له
لكني ظليت كل ما خطرت ببالي القصة أشعر بتأنيب
الضمير ....
وبأقل من ٥ ثواني
قبلت صداقته
وبعثت له مسيج قلت له فيه يسعدك ويسعد كل اهل سحاب
رد علي بمسيج بجنن
بقول فيه ..
اشكرك على قبول صداقة
احد طلابك
وما بنسى موقفك معي
لما صالحتني وتأسفت
لي بعد ما صفعتني كف
ونزلت شماغي وعقالي
عن راسي
وانا بعرف ما كنت قاصد تهيني
لكنك بتظل استاذي
واحترامك على راسي
استاذ محمود كل أولادي
وزوجتي بهدوك السلام
انت ما كنت استاذ وبس
انت كنت اخ لكل الطلاب
كنا نشوف فيك اخلاق اهل السلط
والله العظيم بعدنا بنحبك
ولما نشوف صورك ومنشوراتك
بنرجع للماضي وبنتخيل
حالنا بعدنا طلاب
وبعدك استاذ اللغة العربية
بمدرستنا
شايفين اخلاق طلاب زمان
شايفين الأدب والوفاء
اي دولة في العالم بدها
تصير زي العالم والناس
عليها بالمعلم
اذا احسنت الإختيار
وحسنّت الأحوال
انا بضمنها بعد ٢٠ سنة
يصير عندها أجيال بتفاخر فيهم العالم
اصدقائي منشورات طويلة
وأحيانا بترفع الضغط
بترجاكوا تسامحوني
صباحكم عسل ...
وعلى ذكر العسل
ما تشتروا عسل من البياعين اللي بلفّوا
ع البيوت
غالبيتهم بدون ضمير
وعسلهم مغشوش
انا بحكيلكم عن تجربة
الله لا يسامحه اللي
ضحك عليّ وعلى كل اهل
الحي
الغشاشين والنصابين
عندهم أساليب ابليس
ما بقدر عليها

الطالب كان بالأول ثانوي