سرايا - كشفت الفنانة فريدة سيف النصر، سبب ابتعاده عن المشاركات السينمائية خلال الفترة الماضية، لافتة إلى أنها تعتذر عن العديد من الأدوار بسبب انشغالها في العمل المتعاقد عليها، حيث انها ترفض المشاركة في أكثر من عمل.

وقالت «فريدة» خلال استضافتها ببرنامج «أسرار النجوم» على «نجوم إف.إم»، قائلة: «ماليش في السوشيال ميديا ودايمًا بقول شغلك هو اللي يتكلم عنك، وأنا برفض أدوار كتير ما بعملش 3 و4 أدوار في الموسم لأن مش معقول الناس تشوفني هنا وهنا طب هوحشهم إزاي، أنا بتعامل مع الدور كأني بخطب أو بتجوز».

وتابعت: «أتا اتعودت أشتغل مع ناس كبيرة محمد خان وعاطف الطيب وفريد شوقي وعاطف سالم وسمير صبري وكانوا بيختاروني من بين بنات كتيرة وده علشان عندك الموهبة وده خلاني أتمسك بأني أكون إلى حد ما راضية ومحافظة على ثقة جمهورك فيا».

وأضافت: «ما كنتش بشتغل في التلفزيون لأني حسيت الفيديو صعب ومرهق السينما بعمل شوتين تلاتة وبعدين برتاح لكن الفيديو فيه راحة».

وتحدثت عن ذكرياتها مع الفنانين الكبار الذين عملت معهم وقالت: «نور الشريف أستاذي كان بيقول لي هتبقي ممثلة كبيرة جدا أقول له ليه يقول لي علشان عينيكي، وإن فيه ممثل عينيه بتبقى زي السمكة ده ما تاخديش منه أي تعبير، والصوت كمان عامل مهم جدا مع الثبات الانفعالي».
وأضافت: «اشتغلت مسرح وسينما مع الراحل سمير غانم، أنا كنت بحب الرقص والغنا جدا فهو كان مسميني (فريدة سيف الرقص)، وهو كان مرحلة من حياتي هو ودلال عبدالعزيز وكنا شلة مع بعض وعائلات مع بعض وفيه حب»