بقلم : محمود قطيشات

لو تعرفوا قديش ندمت
لما رحت اعزّي شخص
لما ماتت بنته
وكل ما بتذكر القصة بقول
يا ريتني ما رحت
البنت ماتت دهس
وأبوها مباشرة أنهى الموضوع بدون صلحات
وبدون عطوات
وجاهات
و وجاهات ...
حتى راح بنفسه اطلع السايق من السجن
أنا لما سمعت بهذا السلوك الطيب من والد البنت اللي توفاها الله
قلت والله انه بستحق
التعزية والتكريم
على فكرة نسيت احكي لكو
بأنه والد المرحومة كان
موظف حكومة وبرتبة
مدير
وتحت تصرفه سيارة وشوفير وخدم وحشم
لكن واقسم بالله العظيم
ان ذهابي الى بيت
الأجر كان من باب تكريم للرجل
على حسن ما قام به من
مسامحة السائق واسقاط كافة الحقوق القانونية والعشائرية عنه
بعد ما تبين انه لم يرتكب
اي خطأ في السواقة بل ان ابنته قطعت الشارع
بطريقة غلط
كان بيت العزاء يعج
بالمسؤولين من كافة
الرتب والمناصب والشيوخ والوجهاء ...
أما أنا العبد الفقير الى الله
والغني عن كل المسؤولين
اللي بفكروا المنصب دايم
لحضراتهم فقد جئت للحصول على
الأجر والثواب
ولجبر خاطر والد
المرحومة
الله وكيلكو فُتت وقعدت
وطلعت ما أعطاني ذرة
اهتمام
كل ما دخل باشا او صاحب معالي او عطوفة
كان يسرع لاستقباله واختيار صدر المجلس
ليجلسه في الصدارة
طوال الوقت كان منهمكا في استقبال وتوديع اصحاب المناصب
اما انا فلم يعطني أدنى
اهتمام
مع إنه في قرارة نفسه
بعرف اني مش سائل عنه
ولا عن منصبه ولا عن الأبهة اللي هو عايش بيها
المهم قعدت ببيت العزاء
١٣ دقيقة وهو منهمك
باستقبال الناس اللي هو شايفهم فوق فوق
وانا طول هاي الفترة
وانا قاعد براقب فيه
وبطريقة استقباله الحميم
لأصحاب المناصب
بالأخير احترمت نفسي
وغادرت المكان
وكنت غضبان أسفا على مجيئي لتعزية رجل فارط ما بسوا بشتيكة
بعد أقل من ٣ شهور
تم أحالة هذا الرجل على
المعاش
ولسؤ حظه ...
توفي والده
سمعت من أشخاص ممن راحوا يعزّوه
بأنهم ما شافوا ولو شخص واحد عليه العين
اجا يعزيه
كل اللي أجوا على بيت الأجر عدد محدود
ما فيهم واحد صاحب منصب
او واحد عليه العين
ولكن لما ماتت بنته كان
بعده بالوظيفة
ولما مات ابوه كان طالع من المنصب
وحسب روايات الناس اللي راحوا يعزّوه
ما شافوا واحد من المعزين عليه العين
طبعا انا ما رحت اعزيّه
ولليوم بستخسر مشواري
اول مرة عليه
بدي احكي لهذا الرجل وامثاله كلمة
ورزقي على الله
اي شخص بيجي على بيتك يعزيك لازم تحترمه
وتقدّر جيّته
وانه الشخص اللي جاي عليك بسيارته
او بتكسي أجره هو اللي جاي يوخذ بخاطرك
جاي منشانك
وجاي يكسب الأجر
مش جاي كرمال منصبك
ولا منشان موقعك
جاي اكرام لله
اصدقائي ادوشتكوا معي
بس حبيت افرجيكوا
كيف بعض الناس بتعاملوا
مع صاحب الوظيفة العالية
وكيف بتعاملوا معه
وهو بالمنصب
وكيف بنسوه لما بغادر المنصب
ويا أسفي على كل مسؤول
بفكر الكرسي دايم لجنابه
بدي اوشوش اصدقائي
وشويشيّة زغيرة
بس ما تجيبوا سيرة
صرت لما اشوفه باي مكان اعمل حالي مش شايفه

• إقرأ أيضاً : "ضربات استباقية " المخابرات تدمر مخططات تخريبية وتؤمن الوطن
• إقرأ أيضاً : مَن يُنقِذُ أمريكا
• إقرأ أيضاً : ولي العهد .. العضيد والسند الأمين

لمتابعة وكالة سرايا الإخبارية على "فيسبوك" : إضغط هنا

لمتابعة وكالة سرايا الإخبارية على "تيك توك" : إضغط هنا

لمتابعة وكالة سرايا الإخبارية على "يوتيوب" : إضغط هنا